網紅的藏寶箱當年拍「金雞」尹志文剛剛入行做我們的第二副導演。記得佢好盡責。拍戲現場地方很細，迫滿很多嫖客同很多雞，當然係茄喱啡。佢好有火，不停小來小去，控制現場大局。做哂我想做嘅嘢。講哂我想講嘅粗口。
跟住好多年無見。聽到行內人話佢搞咗好多年蘇樺偉嘅劇本，喺各大公司兜兜轉轉游車河，即係開唔到。大前年終於古天樂揾我，問我有無興趣。我看完第一稿劇本，約了導演傾。傾足一年。因為我覺得個故事最好睇同最感動我嘅係蘇媽同偉仔嘅關係。感動我嘅唔只係偉仔嘅毅力，而係做偉仔嘅媽媽需要更大嘅毅力。其實體育，田徑，比賽，輸贏，金牌都係其次。母子關係先係呢部戲嘅核心。我每次見到蘇媽都好感動。我好佩服佢。覺得佢好偉大。我不停在想如果我係佢，我會唔會做到佢咁？其實尹志文導演都有無比毅力。佢搞左呢個戲十年。死咬住唔放。中間經歷好多老闆嘅拒絕。同我傾劇本，我都好蹺口摻手。但係佢都一一捱過來。我第一次見到蘇媽，連佢都話拍出嚟邊有人睇㗎。
煞科宴嗰晚，佢飲咗好多，見人就喊。做咗一晚「醉街」導演。而家睇到呢部電影有咁好嘅成績，我就好似蘇媽望住個仔咁。Jimmy，你都係神奇小子。
#媽媽的神奇小子
Search